सवारी र पसलमा जोर बिजोर र बार लागु गर्दै उपत्यकामा थप एक साता निषेधाज्ञा

काठमाडौँ, काठमाडौँ उपत्यका थप एक साता निषेधाज्ञा थप्ने निर्णय गरिएको छ ।आइतबार उपत्यकाका तीन प्रमुख जिल्ला अधिकारीहरुको बैठकले यस्तो निर्णय गरेको हो ।

अबको निषेधाज्ञामा भने थप खुकुलो हुनेछ । सवारी साधनमा पनि जोर बिजोर प्रणाली लागु गरेर अघि बढिने सीडीओहरुको बैठकले निर्णय गरेको छ ।

आइतबार, मंगलबार र बिहीबार सुनचाँदी, भाँडा, विद्युतीय,  घरायसी सामान बिक्री गर्ने पसल सञ्चालन हुनेछन् । त्यस्तै, अटोमोबाइल र त्यसका पार्टपूर्जा पाइने पसल पनि खुल्नेछ ।

सोमबार, बुधबार र शुक्रबार सपिङ मल, खेलकुद सामग्री पसल, कपडा, जुत्ता पसल खोल्न दिने निर्णय भएको छ । यस्तै फेन्सी, कस्मेटिक, गिफ्ट र टेलरिङ खुल्नेछन् ।

बारका आधारमा खुल्ने पसल बिहान ११ देखि ४ बजेसम्म खोल्न दिने निर्णय भएको प्रजिअ पराजुलीले बताए । खाद्यान्न, फलफूल र तरकारी पसल चाहिं हरेक दिन ११ बजेसम्म खुल्नेछ ।