२ हजार ८३४ दशमलव ४० विन्दुमा झर्यो शेयर बजार

साताको दोस्रो कारोबार दिन पनि नेप्से परिसूचकले ओरालो लाग्ने क्रमलाई निरन्तरता दिएको छ।गत जेठ ३१ गते हालसम्मकै उच्च विन्दु कायम गरेको नेप्से परिसूचक असार १ गतेदेखि भने निरन्तर घट्दै आएको छ ।
असार १ गते शेयर बजारको नियामक निकाय नेपाल धितोपत्र बोर्डले सूचीकृत ५१ ओटा कम्पनीहरुको शेयरमा गरेको लगानी जोखिमयुक्त रहेको धारणा सार्वजनिक गरेसँगै बजारमा नकारात्मक प्रभाव परेको हो ।
आज धेरै गुमाउनेमा फाइनान्स कम्पनी र दोस्रोमा जलविद्युत् कम्पनीहरु देखिएका छन् सोमवारको कारोबारमा पनि सबै समूहगत परिसूचकहरु घटेका छन् । बैंकिङ्गको १ दशमलव ७७ प्रतिशत, व्यापारिकको शून्य दशमलव ७७ प्रतिशत, होटल्स तथा पर्यटनको ४ दशमलव ५१ प्रतिशत, विकास बैंकको ४ दशमलव ६ प्रतिशत, जलविद्युतको ५ दशमलव २ प्रतिशत, वित्तको ५ दशमलव १८ प्रतिशत, निर्जीवन बीमाको २ दशमलव ८९ प्रतिशतले घटेको छ । विकास बैंक समूह ४ दशमलव ६ प्रतिशतले गिरावट आउँदा सबैभन्दा धेरै कमाउनेमा नारायणी डेभलपमेन्ट बैंक देखिएको छ ।