सार्क राष्ट्र प्रमुखहरुको बैठक बोलाउन प्रधानमन्त्री देउवासँग माग

काठमाडौं, मानव अधिकार तथा शान्ति समाजले दक्षिण एसियाली सहयोग संगठन (सार्क) लाई सक्रिय बनाउन प्रधानमन्त्री शेरबहादुर देउवालाई आग्रह गरेको छ । सरकारी निवास बालुवाटारमा सोमवार ज्ञापनपत्र बुझाउँदै समाजले अध्यक्ष राष्ट्रको हैसियतले सार्क सक्रिय बनाएर दक्षिण एसियामा शान्ति र स्थायित्वका लागि प्रभावकारी भूमिका निर्वाह गर्न आग्रह गरेको हो ।

समाजले सार्क राष्ट्र सरकार प्रमुखको बैठक बोलाउन पनि माग गरेको छ । अफगानिस्तानमा तालिवानद्वारा सत्ता कब्जा पश्चात विकसित घटनाक्रमका कारण त्यहाँ फसेका सबै दक्षिण एसियाली नागरिकहरुको उद्धार र सकुशल आ-आफ्नो देश फिर्तिका लागि अध्यक्ष राष्ट्र नेपालले तत्काल सार्क राष्ट्रका सरकार प्रमुखको भर्चुअल बैठक आयोजना गरि एकीकृत एवं प्रभावकारी अभियानको प्रारुप तयार गर्न समाजका पदाधिकारीले आग्रह गरेका हुन् ।

यसैगरी विश्वव्यापी उष्णता, जलवायु परिवर्तन र हिमालय संरक्षणका सम्बन्धमासमेत ध्यानाकर्षण गराइएको छ । छलफलमा आणविक अस्त्रको विकास, परीक्षण, उत्पादन/निर्माण, भण्डारण आदीलाई निषेध गरेको आणविक हतियार निषेध सन्धिलाई तत्काल अनुमोदन गर्न आग्रह गरिएको समाजका सभापति गोविन्द खनालले जानकारी दिए । प्रतिनिधिमण्डलमा सल्लाहकार होमकान्त चौलागाई, महासचिव रामकृष्ण बराल, कोषाध्यक्ष जगन्नाथ पुडासैनी, केन्द्रीय सदस्य विष्णु भुषाल र काठमाण्डौ शाखा सभापति ईश्वर पुडासैनी संलग्न थिए ।